لەگفتوگۆیەكی نێوان ماتیلد و ژوولییەنی پاڵەوانی رۆمانی "سوور‌و رەش"ی ستانداڵ لەلاپەڕە 408 دا ماتیلد بە ژوولییەن دەڵێ: ( جەنگەكانی "یەكگرتن" ی سەردەمی پاڵەوانی مێژووی فەرانسەیە. لەو سەردەمەدا هەموو كەس بەئارەزووی دڵی خۆی ئەچوو بۆجەنگ. هەموو كەس بۆسەركەوتنی پارتەكەی ئەچوو بۆجەنگ، نەك وەكو ئەم سەردەمی ئیمپراتۆرییەی ئێوە، لەڕێگەی خراپەكارییەوە مەدالیایەك بەدەستبهێنی، ئەبێ دان بەوەدابنێین كە لەو سەردەمەدا خۆپەرستی و سپڵەیی كەمتربوو. من ئەو سەردەمەیەم خۆش ئەوێ!"
منیش ئەو سەردەمەیەم خۆش ئەوێ كە شۆڕشی رزگاریخوازی كورد لەم بەشەی كوردستان سەرەڕای كەموكوڕیی زۆرو لەمپەری زۆر لەبەردەمییدا لەلایەك‌و ئەوپەڕی بەهێزی رژێمی بەعسیش لەلایەكی دیكەدا، بەڵام ئومێدێك و نەخشەیەك هەبوو بۆ دواڕۆژ ، ئەورۆژگار ئەگەرچی زۆر سەخت و بێ قوربانیی نەبوو، بەڵام بۆ شتێك دەژیاین كە سەربەخۆیی و خۆبەڕێوەبەری لەئامانجە مەزنەكانییبوون، ئەمڕۆ هەرچەندە بەڕووكەش لەدۆخێكی بەمشێوەیەداین، واتاخۆحوكمڕانیین، بەڵام لەسایەی ئەو حوكمڕانێتییەدا بەپێچەوانەی ئامانجە پیرۆزەكانی ئەوێ رۆژێ، تەواوی وڵات نغرۆبووە لەگەندەڵی" بە بێشەرمیش هەموویان دانی پێدادەنێن"، شتێك نەماوەتەوە بەناوی ئومێد، ئەوەی هەیە ژیانێكە لەپێناو ژیان ، لەپێناو مانەوەیەكی نەمرەو نەژی. ئەمە ئەو بەخششەیە كە بەمیللەتی رەوا دەبینن. ئەمە ئەو دەستكەوتەیە كە نابێ لەوە زیاتریان لێچاوەڕوان بكەین.
ليست هناك تعليقات:
إرسال تعليق